Maraqlı cavablar...

           Həddindən artıq kök olan bir nəfər Bernard Şounun arıqlığına işarə edir: “ Sizə baxanda adama elə gəlir ki, İngiltərə aclıq çəkir.” Bernard Şou kefini pozmadan: “ Sizə baxanda isə elə fikirləşmək olar ki, İngiltərənin aclıq çəkməsinə səbəb sizsiniz.”

 

Makedoniyalı İsgəndər öz qoşunu ilə Daranın üzərinə hücum edəndə Dara İsgəndəri qorxutmaq üçün ona yazır: “ Bil ki, Dara tək deyil. Biz – yetmiş min nəfərik.” İsgəndər ona cavab göndərir: “ Sən də bil ki, qoyunların çoxluğu qəssabı qorxutmur.”

 

Tanınmış Amerika dirijoru Stokovski konsertlərin birindən sonra demişdir: “ Bu orkestr möcüzə yaratdı! Ölməzliyinə qəti əmin olduğum bir əsəri yarımca saatın içində məhv elədi!”

 

Bir nəfər məşhur filosof Aristippə filosofları həmişə varlıların qapısı ağzında gördüyünü söyləyir. Aristipp cavabında: “ Nə olsun ki, həkimlər də həmişə xəstələrin qapısı ağzında olurlar, amma hər bir xəstə arzulayır ki, özü həkim olsun.”

 

Platondan soruşurlar: “ Sən dəfələrlə dəniz səyahətində olmusan. Bu səfərlər zamanı gördüyün ən böyük möcüzə nə olub ?” Platon: “ Sağ-salamat sahilə çıxmağım.”

 

Bir dəfə fransız yazıçısı Andre Moruadan soruşmuşlar: “ Tarixin gedişatını kim daha çox dəyişib: Sezar yoxsa Napoleon ?” Yazıçı cavab verib: “ Bəşəriyyət yaranandan tarixin gedişatını heç kəs tarixçilər qədər dəyişdirə bilməyib.”

                 Məşhur Finlandiya bəstəkarı Sibeliusdan soruşurlar ki, nə üçün o, musiqiçilərdən daha çox biznesmenlərlə söhbət etməyi xoşlayır. Sibelius deyir: “ Mən musiqiçilər arasında olanda bütün söhbt pul barədə olur. Biznes adamları isə mənimlə yalnız musiqi haqqında danışırlar.”

 

“Günəş kral”-14-cü Lüdovik saray adamlarından biri ilə söhbət edərkən ondan soruşur: ” Siz ispan dilini bilirsinizmi?” – “ Əlahəzrət, təəssüflər olsun ki, bilmirəm.” – “ Onda bəxtinizdən küsün!” Əyan elə güman edir ki, kral onu İspaniyaya səfir təyin etmək istəyir, buna görə , qısa bir zamanda ispan dilini öyrənib, kralın yanına gəlir: “ Əlahəzrət, mən artıq ispan dilini bilirəm.” Lüdovik cavab verir: “ Təbrik edirəm. İndi siz “ Don-Kixot” əsərinin orijinalını oxuya bilərsiniz.”

 

Bir dəfə bir qadın Ernst Heminqueydən soruşur: “ Deyilənə görə, əlində elektrik fənəri olsa, gecələr şirlərdən qorxmaya bilərsən. Bu, doğrudur?” Heminquey deyir: “Xanım, bu asılıdır ondan ki, siz hansı sürətlə qaça bilirsiniz.”

 

Təzəcə səhnəyə gəlmiş, lakin özünü istedadlı faciə aktyoru hesab edən bir nəfər tanınmış sənətkar Rıbakovdan xahiş edir ki, “ Otello” tamaşasında onun oyununa baxsın və tamaşadan sonra ondan soruşur: “ Hə, necə idi? Dezdemonanı yaxşı öldürdüm?” – “ Dezdemonanı yaxşı öldürdün, Şekspiri isə ondan da yaxşı öldürdün!”